À definement d’esteit
Lairai ma jolieteit,
Yvers vient tout apresteis,
  Froidure repaire ;
J’ai trop esteit an folie,
  Si m’an voil retraire.
 
Retraire ne m’an puis mais,
Car je sui dou tout à bais ;
Jeu des deis m’ont mis à baix
  Par ma ribaudie ;
Or ai perdut tous mes drais
  Fors ke ma chemixe.
 
Ma chemixe voirement,
Si ait povre garnement,
S’or vaxit ne tant ne quant,
  À geu l’euxe mise,
S’alaixe legierement
  Encontre la bixe.
 
La bixe et li autre vant
M’i guerroient mout sovent ;
Par derrier et par devant
  Me peirt la chair nue ;
Or m’i soit Deus en aidant,
  Ma joie ai perdue.
 
Ma joie et tous mes amins
Ai je perdut, las, chaïtis !
Or n’iroie an mon païs,
  Por perdre la vie,
Tant com je serai soupris
  De la ribaudie.
 
Ribaudie m’ait costeit
Et geteit de mon osteil,
Les femes n’ont assoteit
  Où je me fioie ;
Cent livres m’ont bien costeit
  De bone monoie.
 
Chascun jour me covanroit
Plain un sestier de doniers
Se j’eüxe monoier
  Ke forgest monoie,
Il n’en savroit tant forgier
  Com j’an despandroie.
 
J’ai plus despandu d’avoir
Au folie c’an savoir ;
Ceu que me deüst valoir
  Et mettre en chivance,
Ceu ai mis en nonchaloir,
  Teil est ma jujance.